الشاعر ابراهيم رضوان بعد نكسة ٦٧ اتقابل الفنان محمد نوح مع صديقه الشاعر ابراهيم رضوان وبالصدفة شاف في ايده ورقة فيها كلمات اغنية جديدة.
الكلمات حمست محمد نوح اللي كان موهوب في العزف على اكتر من آلة موسيقية شرقية غير دراسته في معهد الموسيقى العربية عشان كده قدر يلحن الكلمات ويعمل اغنية “مدد مدد” ..اللي تعتبر اشهر اغنية في مسيرته كلها.
الاغنية انتشرت جدا بعد النكسة وكان محمد نوح بيغنيها في اي مناسبة او تجمع لرفع الروح المعنوية للشعب المصري وبقت أيقونة في اي مناسبة وطنية لدرجة ان الموضوع وصل لمباريات المنتخب!!
سنة ٧٦ كان منتخب مصر بيلاعب تونس في تصفيات المونديال في ملعب “ناصر” سابقا او ستاد “القاهرة” حاليا وكان محمد نوح بين الحضور كمشجع وطبعا الجمهور طلب منه الاغنية و تخيل انت بقا نوح بيغني و حوالي ١٠٠ الف متفرج بيردوا وراه !!
مشهد حماسي جدا ولع الملعب وألهب حماس اللاعبين عشان يحققو الفوز على تونس في مباراة صعبة جدا.بعد النجاح ده كان محمد نوح دايما موجود في مباريات المنتخب .. حتى في كاس امم افريقيا ٨٦ اللي اتلعبت في مصر اخد معاه فرقة موسيقية .. الفرقة تعزف وهو يغني والجمهور يرد وراه “مدد مدد مدد مدد .. شدي حيلك يا بلد”رحل نوح في ٢٠١٢ …
لكن لأن اغنيته اتعملت باحساس صادق وبإتقان عاشت من الستينات لحد دلوقتي وحفظها الجمهور المصري حتى اللي ما يعرفوش مين هو محمد نوح.
