لما حد بيموت فجأة بلاقي صورته مالية السوشيال ميديا ومليون شخص بيكتبوا إنهم كانوا الأقرب ليه، وتبتدي مواقع بير السلم وصحفي علي ماتفرج وكل من هب ودب ينزلوا فيديوهات وحكايات وأسرار يمكن ماحصلتش أصلًا…
ما هو الميت مش هيرجع يصحح ولا يكذب ولا يواجه.
ونلاقي كاميرات الموبايلات هاجمة على الجنازة والدفنة عشان اللقطة والمشاهدات.طب كنتم فين وهو عايش؟
فين المكالمه الي كنتم بتطمنوا بيها عليه؟
فين الكلمه الحلوه الي كنتم بتطبطبوا بيها علي قلوبهم؟فين سؤال إلي من من القلب ومن غير غرض ولا مصلحه؟
فين الدعم وقت الضيق؟
للآسف بقى بعض الناس بتتعامل مع الموت كأنه تريند مؤقت مش لحظة وداع وإنسانية ووجع.
أغرب حاجة إن ناس كتير بتبخل بالمحبة علي الناس وهي موجودة وتغرق في المديح بعد الرحيل.
(لا يضر الشاة سلخها بعد ذبحها) مع إن الورد في إيد الحي احلي وأبهج من انه يدبل فوق قبره، والكلمة الطيبة لها قيمه لما يسمعها مش لما يموت ونسمعها إحنا لبعض.
الوفاء الحقيقي مش بوست بنتسابق بيه بعد الرحيل..الوفاء الحقيقي حضور وسؤال ومودة واحترام وإنت قادر توصلهم لصاحبهم وهو لسه بينا…حيّ يرزق.
