#بابا #محمد_نوح كان من الناس الي بتهتم جداً بالكلمه في الغناء وكان دايما بيرفض ان رجل يغني كلمات فيها إنكسار او انهيار او بكي ودموع وذل كان يقول الراجل ماينفعش يقول الكلمات دي ويغنيها كمان كان برغم حبه وتقديره لأصوات عظيمه بيعشقها لكن بينتقد بعض كلمات أغانيهم وكان حتي لما بيقابلهم بيقولهم ده ويهزر معاهم زي مثلا أغنية يا رايحين الغوريه هاتو لحبيبي هديه كان بيقول هو عاوز يحب شكك وكسلان ينزل هو يجيب لحبيبته الهديه وبيتشرط كمان هاتولي توب بالقصب وطرحه وشال واسوره وخلخال وحلق بدلايه ايه الحبيب الكسلان دهاو مثلاً ياشبشب الهنا ياريتني كنت انا !!
يقول ازاي راجل يقبل او يحب يكون شبشب في رجلين حبيبته وكمان كان بيقول للعظيم محمد قنديل إلي كان صديقه جداً يا محمد إنت ماينفعش تبقي مكلبظ كده وتغني كتر الملامه عليه والله ماخلت فيه وكان العظيم محمد قنديل يقعد يضحك كان دايما بابا بيقول وانت بتغني لازم الناس تصدقك ماينفعش تبقي رفيع وسفيف وتقول شيلني شيل يا وله أو انا حاكسر الدنيا الكلام ده كان ينفع في الاذاعه.
لكن قدام الناس في حفله او في التلفزيون ماينفعش الناس مش حاتصدقك والحقيقه انا كمان اتآثرت بكلام بابا ومقتنعه جدا بيه علشان كده ممكن صوت يعجبني لكن مايعجبنيش اختياره لكلمات اغانيه وفعلا مابقدرش اسمع اغنيه لرجل والاقيه فيها بيبكي ويقول انه منهار او مجروح ماينفعش أشوف مطربه بتصحك وهي بتغني عن الهجر وبقيت بشوف الكلام بعيون وعقل بابا وبقيم بنفس الطريقه.
