الخبير العسكرى اللواء سامى دنيا يعيش معكم حكاية حصان طروادة: القصة الشهيرة أصلها مصرى ياشباب

■إللى سمعناه عن اليونانيين إللى خبّوا جنودهم فى حصان خشبى وقالوا إنه هدية لأهل طروادة، وبعدين خرجوا وإستولوا على المدينة!!!
■دى فكرة جت من مصر القديمة!!!
■القصة مكتوبة فى بردية «هاريس 500»، موجودة فى المتحف البريطانى، كتبها قائد مصرى إسمه «تحوتى» فى زمن الملك «تحتمس الثالث» ..
■تحوتى كان مكلف ياخد مدينة يافا، لأن أميرها «يوبا» كان بيهاجم الحدود المصرية وقتل جنود مصريين. بس يافا كانت محصنة جداً، فتحوتى فكّر فى خطة ذكية ..
■بعت رسول ليوبا، وقاله إنه تمرد على تحتمس الثالث، وإن الملك هرب بعد هجوم جنود تحوتى، وقال إنه عايز يتحالف مع يوبا، وجايب هدايا غالية، منها «صولجان سحرى» بتاع الملك يخلّى إللى يمسكه يختفى ..
■يوبا صدّق، لأنه كان عايز الصولجان ..
■تحوتى دعا يوبا لعشاء فاخر برا يافا، وقدّم له خمر خلّى يوبا وجنوده يسكروا تماماً ..
■لما يوبا طلب الصولجان، تحوتى جاب عصا كبيرة وقاله: «ده الصولجان!» وضرب يوبا على دماغه!!!
■بعد كده، نفّذ تحوتى الجزء التانى من الخطة، جهّز 200 برميل، وخبّى فى كل برميل جندى مقاتل، قال للحراس إن البراميل دى هدايا لزوجة يوبا، الحراس فتحوا البوابة، والبراميل دخلت، فجأة، خرج الجنود وإستولوا على يافا فى دقايق!!!