لازم تتحط في منهج دراسي يا جماعة لازم كل مدارس العالم تعرفها و تتعلم منها
مبدئياً هي مش سلطنة اسماً بل أسلوب حياة معندهاش مشاكل و لا مع روسيا و لا أمريكا و لا الهند و لا باكستان و لا ايران ولا اي شئ و مع ذلك مفتي السلطنة دايماً بيتكلم عن انه ضد ولاد العم و اللي بيحصل منهم مع اخواتنا.
مش بتعمل مشاكل مع حد و لا تعنف حد و لا تشخط في حد، السلطان بتاعها أسمه “هيثم طارق” و دة لا يمكن يكون أسم حاكم يعني أخره يبقي أسم زميلك في مشروع التخرج فى الجامعة و جده كمان أسمه تيمور.
عندها فلوس زي الرز بس ولا عايزين تقدم و أوتيلات و لا ناطحات سحاب عشان النطح في عمان عيب و دوشة، ملهاش اغنية مشهورة و لا فيلم جامد و لا حدث رياضي و لا حتي قام فيها زلزال و لا حتى نزاع حدودي.
تاريخها الأوليمبي كله مفيهوش ميدالية واحدة و أفضل انجاز رياضي ان عداء عماني خد مركز تامن في اوليمبياد سيول ١٩٨٨
عمرك شفت عمان عاملة مشكلة مع حد؟
طب بلاش .. عمرك شفت عماني عامل مشكلة مع حد؟ اظن مستحيل..
بلاش دي كمان .. عمرك شفت واحد عماني أصلا؟
الواحد بياخد نصيب من أسمه، و السلطنة متسلطنة فعلا، ده غير بقى إن سلطنة عمان هي الدولة الخليجية الوحيدة اللي رفضت مقاطعة مصر بعد كامب ديفيد، و من قبلها من حرب ٧٣ كان بيقتطع ربع مرتبات الموظفين هناك و تروح مصر كتشجيع منهم و شكر للمجهود الحربي.
